Shaykh-ul-Islaam Muhammad bin ´Abdil-Wahhaab (Rahimahu Allaah) amesema:
Mlango wa nane
Radd kwa mwenye kudai kwamba du´aa sio ´ibaadah
Akisema: “Mimi siabudu mwengine yeyote isipokuwa Allaah, na huku kutafuta kinga kwa watu wema na kuwaomba [du´aa] sio ´ibaadah”. Mwambie: “Wewe unakubaliana na mimi ya kwamba Allaah kafaradhisha juu yako kumtakasia ´ibaadah, na ni haki Yake juu yako?”
Akisema: “Ndio”, mwambie: “Nibainishie hili ulilofaradhishiwa juu yako, ambalo ni kumtakasia ´ibaadah Allaah pekee, na ni haki Yake juu yako!” Ikiwa hajui ´ibaadah ni nini na aina zake, mbainishie hayo kwa kile anachosema Allaah (Ta´ala):
ادْعُوا رَبَّكُمْ تَضَرُّعًا وَخُفْيَةً ۚ إِنَّهُ لَا يُحِبُّ الْمُعْتَدِينَ
“Muombeni Mola wenu kwa unyenyekevu na kwa siri, hakika Yeye hapendi wavukao mipaka.” (07:55)
Ukishamjuza haya, mwambie: “Umejua sasa kuwa haya [unayofanya] ni ´ibaadah?” Hana budi kusema: “Ndio” – na du´aa ndio kilele cha ´ibaadah.
MAELEZO
Mtu huyo akisema kuwa yeye hawaabudu kama anavyomuabudu Allaah (´Azza wa Jall) na kwamba kuwaelekea na kuwaomba [du´aa] sio ´ibaadah, hii ni hoja tata. Mwambie kuwa Allaah amekufaradhishia kumtakasia ´ibaadah Yeye pekee. Akikubaliana na wewe, muulize ni nini maana ya kumtakasia ´ibaadah. Ima atakuwa ni mwenye kujua au hajui. Ikiwa hajui, basi mbainishie ili ajue kuwa kuwaomba watu wema na kuwaelekea ni ´ibaadah.
Mbainishie aina mbalimbali za ´ibaadah na mwambie kuwa Allaah anasema:
ادْعُوا رَبَّكُمْ تَضَرُّعًا وَخُفْيَةً ۚ إِنَّهُ لَا يُحِبُّ الْمُعْتَدِينَ
“Muombeni Mola wenu kwa unyenyekevu na kwa siri, hakika Yeye hapendi wavukao mipaka.”
Du´aa ni ´ibaadah. Mambo yakishakuwa ni namna hii, kumuomba asiyekuwa Allaah (´Azza wa Jall) ni shirki. Kujengea juu ya hili, yule ambaye anastahiki kuombwa, kuabudiwa na kutarajiwa ni Allaah peke Yake.
- Mhusika: Imaam Muhammad bin Swaalih bin ´Uthaymiyn
- Mfasiri: Firqatunnajia.com
- Marejeo: Sharh Kashf-ish-Shubuhaat, uk. 66
- Imechapishwa: 24/11/2023
