Malaika wako sampuli mbalimbali. Wako ambao kazi yao ni kulinda matendo ya wanadamu. Allaah (Ta´ala) amesema:
إِذْ يَتَلَقَّى الْمُتَلَقِّيَانِ عَنِ الْيَمِينِ وَعَنِ الشِّمَالِ قَعِيدٌ مَّا يَلْفِظُ مِن قَوْلٍ إِلَّا لَدَيْهِ رَقِيبٌ عَتِيدٌ
“Pale wanapopokea wapokeaji wawili wanaokaa kuliani na kushotoni. Hatamki maneno yoyote isipokuwa anaye mchungaji aliyejitayarisha [kurekodi].”[1]
Wanaandika matendo ya mwanadamu ya kheri na ya shari. Wanafanya hivo kwa amri ya Allaah (Subhaanahu wa Ta´ala). Hawa ndio watukufu wenye kuandika waliotajwa katika maneno Yake (Ta´ala):
وَإِنَّ عَلَيْكُمْ لَحَافِظِينَ كِرَامًا كَاتِبِينَ يَعْلَمُونَ مَا تَفْعَلُونَ
“Hakika juu yenu bila shaka kuna wenye kuhifadhi; watukufu wanaoandika. Wanajua yale myafanyayo.”[2]
Huandika matendo ya wanadamu na hupishana usiku na mchana. Kuna Malaika ambao wanakuwa na mwanadamu kipindi cha mchana, wengine wanakuwa naye kipindi cha usiku. Mtume (Swalla Allaahu ´alayhi wa sallam) amesema:
“Wanapishana kwenu Malaika wa usiku na Malaika wa mchana. Wanakusanyika katika swalah ya Fajr na swalah ya ´Aswr. Halafu hupanda wale waliolala kwenu ambapo Mola wenu Anawauliza – ilihali ni mjuzi zaidi kuliko wao: “Mmewaachaje waja Wangu?” Wanasema: “Tumewaacha na huku wanaswali na tumewaendea na huku wanaswali.”[3]
Mambo yanakuwa namna hii siku zote. Kwa ajili hii kisomo cha Fajr kinatakiwa kiwe kirefu. Allaah (Jalla wa ´Alaa) amesema:
أَقِمِ الصَّلَاةَ لِدُلُوكِ الشَّمْسِ إِلَىٰ غَسَقِ اللَّيْلِ وَقُرْآنَ الْفَجْرِ ۖ إِنَّ قُرْآنَ الْفَجْرِ كَانَ مَشْهُودًا
“Simamisha swalah jua linapopinduka hadi kiza cha usiku na Qur-aan ya alfajiri. Hakika Qur-aan ya alfajiri ni yenye kushuhudiwa.”[4]
Ndio maana swalah ya Fajr ikaitwa kuwa ni “kisomo” kwa sababu hurefushwa ndani yake kisomo. Qur-aan ya Fajr ni yenye kushuhudiwa maana yake ni kwamba inahudhuriwa na Malaika wa usiku na Malaika wa mchana. ´Aswr ndio swalah ya kati na kati na ndio swalah bora kabisa. Nayo pia inahudhuriwa na Malaika wa usiku na Malaika wa mchana. Allaah (Ta´ala) amesema:
حَافِظُوا عَلَى الصَّلَوَاتِ وَالصَّلَاةِ الْوُسْطَىٰ وَقُومُوا لِلَّـهِ قَانِتِينَ
“Zichungeni swalah na khaswa swalah ya katikati na simameni mbele ya Allaah katika hali ya utiifu.”[5]
[1] 50:17-18
[2] 82:10-12
[3] al-Bukhaariy (7429).
[4] 17:78
[5] 2:238
- Mhusika: Imaam Swaalih bin Fawzaan al-Fawzaan
- Mfasiri: Firqatunnajia.com
- Marejeo: Bayaan-ul-Ma´aaniy fiy Sharh Muqaddimati Ibn Abiy Zayd al-Qayrawaaniy, uk. 78-80
- Imechapishwa: 31/08/2021
