Miongoni mwa mambo yenye manufaa makubwa na jambo bora zaidi linaloondosha kukata tamaa ni yale yaliyosihi katika Hadiyth ya Usamaah bin Zayd (Radhiya Allaahu ´anhumaa), ambaye amesema:
“Tulikuwa pamoja na Mtume (Swalla Allaahu ´alayhi wa sallam) wakati mmoja katika wasichana wake alipomtumia mjumbe kumweleza kuwa mtoto wake wa kiume ameaga dunia. Akamwambia yule mjumbe: “Ni Chake Allaah kile alichokichukua na ni Chake alichokitoa na kila kitu Kwake kina muda maalum; basi vuta subira na taraji malipo.” Mjumbe akarudi na kusema: ”Anaapa kwamba unatakiwa kuja.” Ndipo Mtume (Swalla Allaahu ´alayhi wa sallam) akasimama akiwa pamoja na Sa´d bin ´Ubaadah, Mu´aadh bin Jabal, Ubayy bin Ka´b, Zayd bin Thaabit na mimi. Mtoto yule mdogo akamnyooshea mkono na moyo wake ukenda mbio kama kwamba ulikuwa kwenye chupa ndogo. Akabubujikwa na machozi. Sa´d akamwambia: ”Ee Mtume wa Allaah! Nini tena?” Akasema: ”Huu ni huruma ambayo Allaah ameiweka ndani ya nyoyo za waja Wake. Hakika hapana vyengine Allaah huwarehemu katika waja Wake wale wenye huruma.”[1]
Ameipokea al-Bukhaariy na Muslim.
[1] al-Bukhaariy (1284) na Muslim (923).
- Mhusika: Imaam Muhammad bin ´Abdillaah bin Naaswir-id-Diyn ad-Dimashqiy
- Mfasiri: Firqatunnajia.com
- Marejeo: Bard-ul-Akbaad ´inda Faqd-il-Awlaad, uk. 104-105
- Imechapishwa: 22/08/2023
