Shaykh-ul-Islaam Muhammad bin ´Abdil-Wahhaab (Rahimahu Allaah) amesema:
Tambua – Allaah Akuongoze katika utiifu Wake – kwamba Haniyfiyyah ndio dini ya Ibraahiym; nako ni kule
kumuabudu Allaah Pekee hali ya kumtakasia Yeye Dini. Hilo Allaah Amewaamrisha watu wote na Amewaumba kwa lengo hilo. Allaah (Ta´ala) Amesema:
وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ
“Sikuumba majini na wanadamu isipokuwa waniabudu.” (adh-Dhaariyaat 51 : 56)
Maana ya “waniabudu” ni wanipwekeshe.
Kubwa Aliloamrisha Allaah ni Tawhiyd, nayo ni kumpwekesha Allaah kwa ´ibaadah. Kubwa Alilokataza Allaah ni Shirki, nako ni kuomba wengine pamoja Naye. Dalili ni Kauli Yake (Ta´ala):
وَاعْبُدُوا اللَّـهَ وَلَا تُشْرِكُوا بِهِ شَيْئًا
“Mwabuduni Allaah na wala msimshirikishe na chochote.” (an-Nisaa´ 04 : 36)
MAELEZO
Amesema (Rahimahu Allaah):
“Tambua – Allaah kuongoze katika utiifu Wake… “
na akikusanya mafunzo na du´aa. Amesema (Rahimahu Allaah):
“… kwamba Haniyfiyyah ndio dini ya Ibraahiym; nako ni kule kumuabudu Allaah Pekee hali ya kumtakasia Yeye dini.”
Kuhusu hilo Allaah amesema kumwambia Mtume wake:
ثُمَّ أَوْحَيْنَا إِلَيْكَ أَنِ اتَّبِعْ مِلَّةَ إِبْرَاهِيمَ حَنِيفًا ۖ وَمَا كَانَ مِنَ الْمُشْرِكِينَ
“Kisha Tukakufunulia Wahy kwamba fuata imani safi kabisa na ya asli ya Ibraahim na hakuwa miongoni mwa washirikina.” (16:123)
Haniyfiyyah ni imani ambapo Allaah anaabudiwa na kupendwa kikweli na inayotupilia mbali shirki. Mtu ambaye ni Haniyf ni yule mwenye kumwelekea Allaah, kuvipa mgongo vyengine vyote na anampwekeshea Allaah ´ibaadah. Hivyo ndivyo alivyokuwa Ibraahiym na wafuasi wake, hivyo ndivyo walivyokuwa Mitume wengine na wafuasi wao. Amesema (Rahimahu Allaah):
“Hilo Allaah Amewaamrisha watu wote na Amewaumba kwa lengo hilo.”
Amewaamrisha kumpwekesha Allaah kwa nia safi. Amewaumba ili wamuabudu. Amewaamrisha wamuabudu Yeye pekee katika swalah zao, swawm, du´aa, khofu, matarajio, vichinjwa, nadhiri zao na aina nyenginezo zote za ´ibaadah. Yote anatakiwa afanyiwe Allaah pekee. Allaah (Ta´ala) amesema:
وَقَضَىٰ رَبُّكَ أَلَّا تَعْبُدُوا إِلَّا إِيَّاهُ
“Mola wako amehukumu kwamba: “Msiabudu yeyote isipokuwa Yeye pekee.”” (17:23)
إِيَّاكَ نَعْبُدُ وَإِيَّاكَ نَسْتَعِينُ
“Wewe pekee ndiye tunakuabudu na Wewe pekee ndiye tunakuomba msaada.” (01:05)
فَاعْبُدِ اللَّـهَ مُخْلِصًا لَّهُ الدِّينَ
“Basi mwabudu Allaah pekee hali ya kumtakasia Yeye dini.” (39:02)
يَا أَيُّهَا النَّاسُ اعْبُدُوا رَبَّكُمُ
“Enyi watu! Mwabuduni Mola wenu.” (02:21)
Watu wameumbwa kwa ajili ya ´ibaadah hii; wamuabudu Allaah pekee, kutekeleza maamrisho Yake na kujiepusha na makatazo Yake. Allaah (Ta´ala) amesema:
وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ
“Sikuumba majini na wanaadamu isipokuwa waniabudu.” (51:56)
Bi maana wampwekeshe katika ´ibaadah na kumkhusisha kwa kutekeleza maamrisho na kujiepusha na makatazo.
- Mhusika: Imaam ´Abdul-´Aziyz bin ´Abdillaah bin Baaz
- Mfasiri: Firqatunnajia.com
- Marejeo: Sharh Thalaathat-il-Usuwl, uk. 18-19
- Imechapishwa: 15/10/2016
