Ulazima wa kufunga Ramadhaan unaanza pale kutapojulikana kuingia kwake. Zipo njia tatu za kujua kuwa Ramadhaan imeingia:
1- Kuonekana mwezi mwandamo. Amesema (Ta´ala):
فَمَن شَهِدَ مِنكُمُ الشَّهْرَ فَلْيَصُمْهُ
“Basi atakayeshuhudia miongoni mwenu mwezi mpya na afunge.”[1]
Mtume (Swalla Allaahu ´alayhi wa sallam) amesema:
“Fungeni kwa kuuona… “[2]
Ambaye atauona mwezi mwandamo yeye mwenyewe basi atalazimika kufunga.
2- Ushahidi wa kuuona au taarifa juu yake. Watu watafunga kwa ushahidi wa mtu mwadilifu ambaye ´ibaadah ni yenye kumuwajibikia ambaye ataelezea juu ya jambo hilo. Ibn ´Umar amesema:
“Watu waliona mwezi mwandamo. Nikamweleza Mtume wa Allaah (Swalla Allaahu ´alayhi wa sallam) kwamba nimeuona ambapo akafunga na akawaamrisha watu kufunga.”
Ameipokea Abu Daawuud na wengineo. Imesahihishwa na Ibn Hibbaan na al-Haakim[3].
3- Kukamilisha idadi ya Sha´baan siku thelathini. Hapo ni pale ambapo hautoonekana mwezi mwandamo usiku wa kuamkia tarehe thelathini za Sha´baan kwa kuwepo vitu vinavyozuia maono kama mfano wa mawingu, vipandikizi na mfano wake. Mtume (Swalla Allaahu ´alayhi wa sallam) amesema:
“Hakika mwezi ni siku ishirini na tisa. Hivyo basi msifunge mpaka mtakapoona mwezi mwandamo na wala msifungue mpaka mtakapouona. Mkifunikwa na mawingu basi ikadirieni.”[4]
Maana ya maneno:
“… ikadirieni.”
kamilisheni mwezi wa Sha´baan siku thelathini. Hayo ni kutokanaa na yale yaliyothibiti katika Hadiyth ya Abu Hurayrah:
“Mkifunikwa na mawingu, basi ikadirieni siku thelathini.”[5]
[1] 02:185
[2] al-Bukhaariy (1909) na Muslim (19/1081).
[3] Abu Daawuud (2342), Ibn Hibbaan (3447), al-Haakim (1541) na ad-Daaraqutwniy (2127).
[4] al-Bukhaariy (1907) na Muslim (2499).
[5] al-Bukhaariy (1909) na Muslim (2516).
- Mhusika: Imaam Swaalih bin Fawzaan al-Fawzaan
- Mfasiri: Firqatunnajia.com
- Marejeo: al-Mulakhasw al-Fiqh (01/374-375)
- Imechapishwa: 24/03/2021
