Swali 403: Ni ipi hukumu ya msafiri kufunga pamoja na kwamba ana uzito?
Jibu: Ikiwa kufunga kunamtia uzito usiyokuwa na uhakika basi imechukizwa. Mtume (Swalla Allaahu ´alayhi wa sallam) alimuona mwanaume ambaye amefanyiwa kivuli na watu wamemsongamana ambapo akasema:
“Huyu ana nini?” Wakasema: “Amefunga.” Ndipo Mtume (Swalla Allaahu ´alayhi wa sallam) akasema:
“Si katika wema kufunga safarini.”[1]
Ama kama anahisi uzito mkubwa basi ni italazimika kwake kuacha kufunga. Kwa sababu Mtume (Swalla Allaahu ´alayhi wa sallam) alikula wakati aliposhtakiwa na watu kwamba swawm imekuwa ngumu kwao. Kisha akaelezwa kwamba wapo ambao wameendelea kufunga ambapo akasema:
“Hao ndio waasi. Hao ndio waasi.”[2]
Ama kuhusu yule ambaye swawm si ngumu kwake basi bora ni yeye kufunga kwa sababu ya kumuigiza Mtume (Swalla Allaahu ´alayhi wa sallam) kwa vile alikuwa akifunga. Abu Dardaa´ (Radhiya Allaahu ´anh) amesema:
“Tulikuwa pamoja na Mtume wa Allaah (Swalla Allaahu ´alayhi wa sallam) katika Ramadhaan katika joto kali. Hakuna miongoni mwetu aliyekuwa amefunga isipokuwa tu Mtume wa Allaah (Swalla Allaahu ´alayhi wa sallam) na ´Abdullaah bin Rawaahah.”[3]
[1] al-Bukhaariy (1946) na Muslim (1115).
[2] Muslim (1114).
[3] al-Bukhaariy (1945) na Muslim (1122).
- Mhusika: Imaam Muhammad bin Swaalih bin ´Uthaymiyn
- Mfasiri: Firqatunnajia.com
- Marejeo: Fataawaa Arkaan-il-Islaam, uk. 462
- Imechapishwa: 06/05/2019
