Swali 1640: Je, inajuzu kupaka ndevu rangi nyeusi?
Jibu: Haijuzu kwa mwanaume kupaka ndevu zake rangi nyeusi, kwa sababu ya amri ya kuiepuka na katazo la kufanya hivo. Abu Daawuud amepokea kupitia kwa Jaabir bin ´Abdillaah kwamba amesema:
“Abu Quhaafah aliletwa siku ya Ufunguzi wa mji wa Makkah, huku kichwa chake na ndevu zake zikiwa nyeupe kama mmea wa Thughaamah. Ndipo Mtume wa Allaah (Swalla Allaahu ´alayhi wa sallam) akasema: ”Badilisheni mvi hii na jiepusheni na rangi nyeusi.”[1]
Hadiyth hii ameipokea Muslim, an-Nasaa’iy na Ibn Maajah.
Ahmad, Abu Daawuud na an-Nasaa’iy wamepokea kupitia kwa Ibn ´Abbaas (Radhiya Allaahu ´anh) ambaye ameeleza ya kwamba Mtume wa Allaah (Swalla Allaahu ´alayhi wa sallam) amesema:
“Kutakuwa na watu watakaopaka rangi nyeusi katika zama za mwisho, watakuwa kama vifua vya njiwa. Hawatanusa harufu ya Pepo.”[2]
Lakini inapendekezwa kubadilisha mvi kwa rangi isiyo nyeusi kwa mujibu wa Hadiyth iliyotajwa ya Jaabir.
[1] Ahmad (03/338), Muslim (06/155) na Abu Daawuud (4204).
[2] Ahmad (01/273) na Abu Daawuud (4212).
- Muhusika: al-Lajnah ad-Daaimah
- Tarjama: Firqatunnajia.com
- Marejeo: Fataawaa al-Lajnah ad-Daaimah (5/166)
- Imechapishwa: 23/10/2026