Abu Ja´far at-Twahaawiy (Rahimahu Allaah) amesema:
56 – ´Arshi na Kursiy ni haki.
MAELEZO
´Arshi ndio kiumbe kikubwa sana, kama inavofahamisha Qur-aan na Sunnah. Kwa ajili hiyo Allaah akaegemeza Kwake Mwenyewe pale aliposema:
وَهُوَ الْغَفُورُ الْوَدُودُ ذُو الْعَرْشِ الْمَجِيدُ
”Naye ni Mwingi wa kusamehe, Mwenye upendo wa ndani kabisa, Mwenye ‘Arshi, Tukufu.”[1]
Zipo Aayah zingine ambazo unaweza kuzipata kwenye maelezo ya [Ibn Abiy-´Izz].
Utambulisho wa ´Arshi kilugha ni kiti cha mfalme. Miongoni mwa sifa zake ndani ya Qur-aan:
وَالْمَلَكُ عَلَىٰ أَرْجَائِهَا ۚ وَيَحْمِلُ عَرْشَ رَبِّكَ فَوْقَهُمْ يَوْمَئِذٍ ثَمَانِيَةٌ
”… Malaika watakuwa kandoni mwake na watabeba ‘Arshi ya Mola wako juu yao siku hiyo [Malaika] wanane.”[2]
Iko juu ya maji. Imesihi katika Sunnah ya kwamba umbali uliopo baina ya ncha ya masikio ya wabeba ´Arshi na shingo zao ni sawa na ndege kuruka kwa miaka 700, kwamba iko na miguu na kwamba ndio paa la Pepo ya Firdaws. Yote hayo yametajwa katika maelezo ya [Ibn Abiy-´Izz]. Yote hayo yanabatilisha kuipindisha ´Arshi maana ya kwamba ni ibara ya ufalme na utawala.
Kuhusu Kursiy, Allaah (Ta´ala) amesema:
وَلَا يُحِيطُونَ بِشَيْءٍ مِّنْ عِلْمِهِ إِلَّا بِمَا شَاءَ ۚ وَسِعَ كُرْسِيُّهُ السَّمَاوَاتِ وَالْأَرْضَ
”Wala hawakizunguki chochote katika elimu Yake isipokuwa kwa akitakacho. Kursiy Yake imeenea mbingu na ardhi.”[3]
Kursiy ni ile inayokuwa mbele ya ´Arshi. Imesihi kutoka kwa Ibn ´Abbaas (Radhiya Allaahu ´anhumaa) aliyesema:
”Kursiy ni mahali pa kuwekea miguu miwili, na ´Arshi hakuna awezaye kuikadiria isipokuwa Allaah pekee.”[4]
Nimeikagua katika kitabu changu ”Mukhtaswar-ul-´Uluww” (36).
Hakuna kilichosihi juu ya Kursiy isipokuwa maneno yake Mtume (Swalla Allaahu ´alayhi wa sallam):
“Mbingu saba na ardhi saba ukizilinganisha na Kursiy ni kama mfano wa pete iliyotupwa kwenye jangwa. Na tofauti kati ya ´Arshi na Kursiy ni kama tofauti kati ya jangwa na pete hiyo.”[5]
Hilo pia linasambaratisha kufasiri Kursiy kwamba ni ujuzi, tafsiri ambayo haikusihi kutoka kwa Ibn ´Abbaas (Radhiya Allaahu ´anhumaa), kama nilivyobainisha katika ”as-Swahiyhah” (109).
[1] 85:14-16
[2] 69:17
[3] 2:255
[4] al-Haakim amesema:
”Swahiyh kwa mujibu wa sharti za al-Bukhaariy na Muslim.” (al-Mustadrak (2/282))
adh-Dhahabiy amesema:
”Wasimulizi wake ni wenye kuaminika.” (al-´Uluww, uk. 61)
al-Azhariy amesema:
”Wanazuoni wameafikiana juu ya usahihi wa upokezi huu.” (Tahdhib-ul-Lughah (10/61))
[5] Jaamiy´-ul-Bayaan (5/399) na Abush-Shaykh katika ”al-´Adhwamah” (2/587).
- Muhusika: Imaam Muhammad Naaswir-ud-Diyn al-Albaaniy
- Tarjama: Firqatunnajia.com
- Marejeo: al-´Aqiydah at-Twahaawiyyah – Sharh wa Ta´liyq, uk. 50-51
- Imechapishwa: 29/09/2024
