Hadiyth ya kwanza
قُلْ هُوَ اللَّـهُ أَحَدٌ
“Sema: ”Allaah ni Mmoja pekee.”[1]
1 – Shaykh Abul-Fadhwl Ahmad bin Hibatillaah bin Ahmad bin Muhammad ad-Dimashqiy ametukhabarisha, kutoka kwa Abul-Mudhwaffar as-Sam´aaniy: ´Abdullaah al-Furaawiy ametuhadithia: ´Uthmaan bin Muhammad Abu ´Amr al-Muhammiy ametuhadithia: Abu Nu´aym al-Ashariy ametuhadithia: Abu ´Awaanah al-Haafidhw ametuhadithia: Abu ´Ubaydillaah, mpwa wa Ibn Wahb, ametuhadithia: Ami yangu ´Abdullaah bin Wahb ametuhadithia: ´Amr bin al-Haarith ametuhadithia, kutoka kwa Sa´iyd bin Abiy Hilaal: Abur-Rijaal amemuhadithia kutoka kwa mama yake ´Amrah, kutoka kwa ´Aaishah ambaye amesema:
”Mtume (Swalla Allaahu ´alayhi wa sallam) alimteua bwana mmoja kuwa kiongozi wa msafara wa kijeshi. Alikuwa akiwaswalisha marafiki zake ndani ya swalah na akimalizia kwa:
قُلْ هُوَ اللَّـهُ أَحَدٌ
“Sema: ”Allaah ni Mmoja pekee.”
Waliporudi, wakamweleza hilo Mtume wa Allaah (Swalla Allaahu ´alayhi wa sallam) ambaye akasema: ”Muulizeni kwa nini anafanya hivo.” Wakamuuliza ambapo akajibu: ”Kwa sababu ni sifa ya Mwingi wa rehema (´Azza wa Jall). Ndio maana mimi napenda kuisoma. Ndipo Mtume (Swalla Allaahu ´alayhi wa sallam) akasema: ”Mwelezeni kuwa Allaah anampenda.”[2]
Ameipokea al-Bukhaariy na Muslim kupitia kwa Ibn Wahb.
Hakuna mtu yeyote katika wale wanaoswali kuelekea Qiblah ambaye ameipinga sifa hii.
[1] 112:1
[2] al-Bukhaariy (7375) na Muslim (813).
- Muhusika: Imaam Shams-ud-Diyn Muhammad bin Ahmad adh-Dhahabiy (afk. 748)
- Tarjama: Firqatunnajia.com
- Marejeo: al-Arba´iyn fiy Swifaati Rabb-il-´Aalamiyn, uk. 31-33
- Imechapishwa: 28/05/2024
