Swali: Nina watoto mayatima, nami ni ami yao tunaishi nyumba moja. Ninawahimiza kudumu katika swalah, lakini katika swalah ya Fajr hawaswali pamoja na mkusanyiko, bali huiswali asubuhi. Nifanye nini? Niwafukuze nyumbani au nifanye nini hali ya kuwa hawana mwingine isipokuwa mimi?
Jibu: Ni juu yako kusimamia malezi yao hata kwa kuwatia adabu kwa kupiga mpaka warekebike na waswali Fajr pamoja na mkusanyiko. Usiwafanyie wepesi, wakiasi, basi wafukuze ikiwa wamefikia umri wa kuwajibika ´ibaadah. Wafukuze kwa maslahi ya nafsi zao. Usiwafanyie wepesi kabisa. Ukiweza kuwatia adabu kwa kupiga basi wapige mpaka warekebike na waswali pamoja na wengine. Mtume (Swalla Allaahu ´alayhi wa sallam) amesema katika Hadiyth Swahiyh:
“Waamrisheni watoto wenu kuswali wakiwa na miaka saba, wapigeni kwa ajili yake wakiwa na miaka kumi na watenganisheni katika malazi.”[1]
Ikiwa wamebaleghe, basi jambo lao ni kubwa zaidi. Wanastahiki kuamrishwa watubie, kwani anayeswali swalah baada ya kuchomoza jua hakuiswali. Ni lazima aiswali katika wakati wake. Aidha ni lazima aiswali pamoja na mkusanyiko msikitini. Haijuzu kulegeza mambo kwa hawa, ni mamoja wawe ni watoto wako, watoto wa ndugu yako au mtu yeyote aliye chini ya uangalizi wako.
[1] Abu Daawuud (495). Hadiyth ni Swahiyh. Tazama ”Nasb-ur-Raayah” (1/298) kwa tamko kama hilo.
- Muhusika: Imaam ´Abdul-´Aziyz bin ´Abdillaah bin Baaz
- Tarjama: Firqatunnajia.com
- Marejeo: Majmuu´-ul-Fataawaa (29/206)
- Imechapishwa: 25/02/2026