Swali: Je, kuna wakati maalum wa kusimama kwa ajili ya kuswali wakati wa kusikia Iqaamah? Kwa msemo mwingine ni kwamba asimame wakati anapomsikia muadhini akisema:
قد قامت الصلاة
“Swalah imesimama.”
au kabla yake au baada ya kumaliza kwake kukimu? Au pengine jambo ni lenye wasaa?
Jibu: Kusimama kwa ajili ya kuswali hakuna wakati maalum katika Shari´ah iliyotakasika. Bali inafaa kwa waswaliji kusimama kwa ajili ya kuswali mwanzoni mwa Iqaamah, katikati yake au mwishoni mwake. Jambo ni lenye wasaa. Sijui dalili ya ki-Shari´ah inayofanya wakati maalum wa waswaliji kusimama wakati wa kusikia Iqaamah. Wanazuoni waliosema kuwa imesuniwa kusimama wakati muadhini anaposema:
قد قامت الصلاة
“Swalah imesimama.”
sitambui dalili yao katika jambo hilo.
Lakini ikiwa wakati wa kukimu imamu hajahudhuria, basi Sunnah kwa waswaliji wasisimame mpaka wamuone. Mtume (Swalla Allaahu ´alayhi wa sallam) amesema:
“Kunapokimiwa kwa ajili ya swalah basi msisimame mpaka muone nimetoka.”
Ameipokea Muslim.
- Mhusika: Imaam ´Abdul-´Aziyz bin ´Abdillaah bin Baaz
- Mfasiri: Firqatunnajia.com
- Marejeo: Majmuu´-ul-Fataawaa (10/367)
- Imechapishwa: 24/09/2021
