Swali: Ni ipi hukumu ya mtu kuweka “Allaah akitaka” (إن شاء الله) katika du´aa yake?
Jibu: Haitakikani kwa mtu anapomuomba Allaah (Subhaanahu wa Ta´ala) akaweka: “Allaah akitaka” katika maombi yake. Bali kinyume chake anatakiwa kuomba kwa matarajio na aadhimishe shauku. Kwani hakuna yeyote awezaye kumtenza nguvu Allaah. Amesema (Subhaanahu wa Ta´ala):
“Niombeni nitakuitikieni.”
Ameahidi kutuitikia. Kwa hivyo hakuna haja ya kusema: “Allaah akitaka”. Kwa kuwa Allaah anapomjaalia mja kumuomba basi anampa moja katika mambo yafuatayo:
1- Kumuitikia maombi yake.
2- Kumuepusha na shari kiasi chake.
3- Akamuwekea nayo kwa ajili ya siku ya Qiyaamah.
Imethibiti ya kwamba Mtume (Swalla Allaahu ´alayhi wa sallam) amesema:
“Asiseme mmoja wenu: “Ee Allaah! Nisamehe ukitaka. Ee Allaah! Nihurumie ukitaka. Bali anatakiwa kuomba kwa matarajio na aadhimishe shauku. Kwani Allaah hakuna wa kumtenza nguvu.”
Pengine mtu akauliza ya kwamba Mtume (Swalla Allaahu ´alayhi wa sallam) si alikuwa akimwambia mgonjwa:
لا بأس طهور إن شاء الله
“Hakuna neno! [Ugonjwa] ni kusafishwa [na madhambi] akitaka Allaah”?
Ndio ni kweli amesema. Lakini kilicho dhahiri ni kwamba hakusema hivo (Swalla Allaahu ´alayhi wa sallam) kwa njia ya kuomba. Alisema hivo (Swalla Allaahu ´alayhi wa sallam) kwa njia ya maelezo na matarajio. Kwa hivyo sio du´aa. Miongoni mwa adabu za maombi ni yule mwombaji aombe kwa matarajio.
- Mhusika: Imaam Muhammad bin Swaalih bin ´Uthaymiyn
- Mfasiri: Firqatunnajia.com
- Marejeo: Majmuu´-ul-Fataawaa (01/90)
- Imechapishwa: 31/05/2017
